اسمحلي ان اناديك بأخي لقوله تعالى:" انما المؤمنون اخوة "، واشهد الله تعالى انني لا احمل مثقال حبة من خردل من غل او كره تجاهك فأنت في النهاية – شئنا ام ابينا – ملكنا ووجبت علينا طاعتك ، ونحن لم ولن نطلب يوما ان تكون غير ذلك . لكن الخلاف لا يفسد للود قضية ..
يا اخوي : اسمع وصلي عالنبي ، سأخاطبك بطريقة امي التي طالما اثر فينا خطابها البليغ رغم تحدثها معنا باللهجة " العامية " فلقد اصبحت لهجتك العامية افضل من لهجتنا نحن وهذا شيء يحسب لك بدون اي نفاق منا او تزلف ،،
اولا : نشكر لك سرعة استجابتك لاطلاق سراح الزميل علاء الفزاع ، ولونا يا اخوي ملينا الوقوع بين مطرقة الحكومة من جهة وسندان المكرمات من جهة اخرى ، واعلم يا ابو حسين ان رسالتك للبخيت كانت واضحة وهي عدم اعتقال الصحفيين، ولكنك شفت بعينك ، ما اخذوا بكلامك !! فان خالفوا التعليمات فيجب معاقبتهم، وان كان هناك اتفاق ضمني بينكم ، فان اعتقال صحفي اخر مستقبلا كفيل بفضح هذا الاتفاق، لانك انت بتعرف واحنا بنعرف انو البخيت وغيره خدم لك لا يعصونك ما امرتهم ويفعلون ما يؤمرون ,
الشغلة الثانية : بالله عليك ما مليت من هالزقوم اللي حواليك 12 سنه؟؟؟؟ ما نفسك يكون تحت ايدك واحد بفهم وبيعمل الصح قبل ما تطلب منه ؟؟؟؟ ولا تقولي من وين تجيب هيك ناس ، والله البلد مليانه فهمانين وشرفاء بس اللي حواليك ما بفرجوك الا اللي بدهم اياك تشوفه.
برضاي عليك تفكك مرة وحدة من "البلاي ستيشن" وتشبك عالفيس بوك وتشوف كيف في شباب زي الورد همهم الوحيد مصلحة البلد ومحاربة الفساد ، بعدين يا ابو حسين بلا مؤاخذة هي الملكية الدستورية بعبع؟؟؟؟
ما بتتمنى انك تريح راسك من دواوين الاردنيين اللي ما بتنتهي ؟؟، يا رجال لما بصير في عصيان في احد المصانع او المعامل بحاول صاحب الشركة يوظف رئيس عمال قريب منهم منشان يأمن شرهم ويشوف شو بدهم ، اما انت للاسف بتصب عالنار كاز ،،، !!!
تزعلش مني امانة ، بس ثلاث شهور واحنا ننبح بالشوارع بدناش سمير وبالاخيرشلتو وجبتلنا البخيت كأنا كاينين تايهين عنه ، وانا بعرف انو مش مطول واكيد رح تجيبلما واحد غيره من هالقدام اللي اكل الدهر عليهم وشرب واثبتو فشلهم ،
انت بتفكر انو تثبيت حكمك بكون بهيك ناس ؟؟؟؟ بتكون كثير غلطان ، تثبيت حكمك يا ابو حسين اساسه حب ال 6 مليون اردني الك ، واذا مش مصدقني اسأل زين او حسني ، شو ساواتلهم الاجهزة الامنية ؟؟؟ بالعكس الكل بيتهم حسني انو هو اللي امرهم بالقتل والتعذيب والاعتقال ، يعني باختصار لما حسوا انو مصلحتهم بطلت معه باعوه ، بس احنا مش قليلين اصل ولا يمكن نبيعك .....
والله مش صعبة يا ابو حسين، ولا احنا طالبين المستحيل ، صدقني انو شيله هالرمم اللي حواليك " زي خلعة الشوكة " على رأي امي بس انت انوي ورح تشوف كيف كلنا رح نكون حرسك الملكي ونفديك بولادنا........
فكر وخذ راحتك وبتمنى تعمل الصح ،
اخوك ابن الاردن
