الروابدة: الو مين معي ؟
الطراونة : انا ابو زيد كيفك يا ابو عصام
الروابدة : اهلين ، والله ميخذ عخاطري منك .
الطراونة : ليش يا رجال حتى انت ، بكفينيش اللي انا فيه ؟
الروابدة : يا رجل كل التعيينات للقرايب والحبايب وناسينا ، ول ؟؟؟
الطراونة : له يا زلمة أأمرني انت
الروابدة: والله بدنا نشغل هالبنت شغلة مرتبه
الطراونة : غالي والطلب رخيص ، هي شو دارسة ؟
الروابدة : بكالوريوس علم اجتماع .
الطراونة : مممم خلاص جيبها عندي بعينها مديرة مكتبي
الروابدة : هههههه ظحكتني يا زلمة والله ، بقولك بدنا شغلة راتبها كويس
مش الفين ثلاث ، بعدين بدنا شغلة دايمة مش شهر شهرين
ومع السلامة ، فاهم علي انت ؟؟؟
الطراونة: ها وين اشغلها ؟ شو رايك احطها مكاني يعني ؟؟
الروابدة : هههه بقولك بدنا شغلة دايمة يعنى حتى مكانك بنفعش !!
اسمع هي اشتغلت بالضمان والها خبرة ، عينها مدير عام
الضمان ، شو رايك ؟
الطراونة : شو بتحكي يا زلمة بدك الناس والصحافة توكل وجهي ؟؟؟
هاي بكالوريوس، والله بننفظح !!
الروابدة : شو فيها يا زلمة ، من ايمتا بنسأل بالناس ؟ بعدين لساهم
بدهم يوكلوا وجهك ؟؟ مهم شالين عرضك وين مكان !!!
الطراونة : طب الله يسامحك دبرلها ماجستير ولا دكتوراه منين مكان خلال
هالشهر وابشر، بدناش تبين كمان انها واسطة عينك عينك ،
يعني واسطة مع شهادة اشوى شوي !!
الروابدة : هههههه يا زلمة انا مش ظامن تظلك رئيس حكومة لبكرة بدك
استنى شهر ؟؟؟؟ شكلك بتمزح او ما بدك تخدمني
الطراونة : الله يسامحك يا ابو عصام ، انت بتعرف انو ما بنعز عليك اشي
والبلد عحسابك ، بس الشارع قايم قاعد وبقولوليش غير ابو
سنسال!!!
الروابدة : مهو الحق عليك ولا بعد الكبرة جبة حمرة ؟؟ بتفكر حالك لسى
شباب لابسلي هالجنزير وداير ، بدكش تكبر ؟؟؟؟
الطراونة : اي هي وقفت عالجنزير ؟؟ ، سيدنا طالب مني ارفع سعر
البنزين والله لاتمرمط مرمطة لكلاب من الناس لو ارفعه .
الروابدة : يا سيدي اربط لحمار مكان ما بقولك صاحبو انت شو دخلك؟؟
الطراونة : مهو بالاخر بلبسوني العمة وبطلع انا لعين الوالدين .
الروابدة : ولا تسأل بحد ابو حسين الله يطول بعمرو حامينا ، والشارع بكرة
بمل وبرجع عبيوتو، بس طول بالك ، هساع خلينا بموضوعنا ،
بدك تعين هالبنت ولا بتردني خايب ؟؟؟؟
الطراونة : ابشر وصلت ، بس هاي مليارات بتعرف بنتك تدبر حالها ؟؟
الروابدة : افا وانا وين رحت بساعدها ، ياما لاعب بمليارات وهابش
هبشات شو نسيت ؟ .
الطراونة : لا ما نسيت بس انت بتزبطش ، لانو بصيرش تتدخل بصفتك شو
بدك تساعدها ؟؟؟
الروابدة : طب اسمع عندي حل !! عينلها 2 او 3 مستشارين ونائب الها
ايكون قد حالو منها بدير المؤسسة ومنها بشيل البلاوي اذا صار
ما صار ،
الطراونة: والله جبتها ، واي اختلاسات او سرقات بتصير بنحطها في ظهرو
لانو المدير العام " بنتك " رح توقع على توقيعه ، يعني هو
المسؤول الاول والاخير !!!
الروابدة : يا عيني عليك ، هاظ الحكي ، وقديش بدك تحسبلها ؟؟؟
الطراونة : زي اللي قبلها 23 الف .
الروابدة: هلحين بنت ابو عصام زي باقي الناس ؟؟؟ خليها 29 الف!!
الطراونة : والله بدك تدهورني انت :
الروابدة : ههههه يالله يا ابو زيد خليها زي ما بقولوا " ظربة مقفي " ما انت
طاير طاير بس ترفع البنزين ، وهالخد تعود عاللطم .
الطراونة : قولتك الله يسترنا من الجاي .
الروابدة : اكتيش بتداوم البنت ؟؟؟
الطراونة : اليوم بطلع القرار ، ووين ما صفت اتصفي ، اصلا بجد قرفت
ساق الله وسيدنا عافيني من هالشغلة كلها .
الروابدة : الله يخلصك عخير يا ابو زيد الف الف شكر الك حبيبي
الطراونة : اهلين اهلين بدنا خدمة تحرز
الروابدة : والله ما قصرت تسلم تسلم ، سلام
الطراونة: هلا هلا ابو عصام .
هلا كفاءة ،،،،،،، هلا عمي
