" بلغ عدد المسجلين في القوائم الانتخابية حتى الساعة 1.7 مليون مسجل ، واكد الخطيب ان هذه النسبة مشجعة لاجراء الانتخابات قبل نهاية العام الحالي كما امر سيد البلاد "...
وهنا بدأ الحوار كالتالي :
اليائس : والله شكلو كل الناس بتسجل ، بكرة بدي اروح اسجل بلكي طلعلنا خمسين نيرة من واحد من هالمرشحين .
المصلح : يا زلمة انت مصدق هالحكي ؟ والله كل لمسجلين ما بيجو ربع مليون .
المثبط : ايوه بلشنا الكلام الفاظي ، لعاد من وين جايبين هالاعداد من دار امي؟
المصلح : مزورة زي اللي قبلها واللي قبل قبلها .
المثبط : وحد الله يا زلمه سيدنا قال فش تزوير .
المصلح : يعني هو كان قايل المرات الماظية انو رح نزور ؟؟؟ مهو قال كمان مفيش تزوير وتزورت .
المثبط : يا اخي هالمرة غير وفي لجنة متابعة انتخابات يعني مش سايبة .
المصلح : طب بدي اسألك سؤال .مش الملك قال انو بدو الانتخابات تصير قبل نهاية السنة ؟
المثبط : طيب :
المصلح : طب شو عرفوا الملك انو اعداد المسجلين رح يوصل للعدد المطلوب ؟؟؟ قصدي اكيد انو الحكومة ما رح تحط ايدها عخدها وتقول للملك اخر السنة والله يا سيدنا ما حدا سجل، ويطلعوا الملك بسواد الوجه ؟؟؟؟ اكيد لازم يتحركوا ويزوروا ويعملوا المستحيل عشان الانتخابات تصير زي ما بده الملك ، صح؟
المثبط : يا زلمه انتو بتدخلو الملك في كل اشي ، حتى اذا قطعت المي بتحكوا عالملك واذا غلي السكر والرز بتحطوها في راس الملك ، اي الله يعينو على هيك شعلة !!!
المصلح : طبعا مش الملك المسؤول عن كل اشي بصير ؟؟
المثبط : وهالبقر اللي بجيبهم لويش ما يشتغلوا زي العالم ؟؟؟
المصلح : هيك قلتها اللي هو بجيبهم يعني هو مسؤول عنهم ، مجبتهمش من دار أمي . وكلهم بيجو بسرقوا وبروحو واحنا يا غافل الك الله .
اليائس: دخيلك !!على اساس لو ما صرقوا هالمصاري كان وزعوها علي وعليك !!! اكيد كان صرقها ميت واحد غيرهم .
المثبط : انا داري قله بالله .
المصلح : يا جماعة مش هاظ قصدي ، انا قصدي ليش الملك ما يخلي الشعب اشكل الحكومة ، وانشالله بروحوا في ستين داهية ، ساعتها ما حدا بلومه .
اليائس : خاس عالعورة المكحلة ، بس ناقصكو تشكلوا حكومات منتو مش شبعانين الخبز
المثبط : والله وجه عرفتو ولا وجه ما عرفتو ، مش احسن ما ييجوا الاخوان ويعجبوا علينا ؟؟؟ والله ان حكموا ليخربوا البلد ، ويقلبولي ياها جوامع ونمشي بدشاديش بالشارع والنسوان بالخمار ، ويحرموا الغناوي ويمكن الشرب مشان ما يظل ولا سايح بالبلد ، ما احنا ناقصنا خربان بيوت !!!
المصلح : مين قالك هالحكي ؟ طب احنا عمرنا جربنا حكمهم ؟ ليش بنحكم عليهم قبل ما نجربهم ؟؟وهو حرام يمنعوا الغناني والشرب ؟
اليائس : يعني هلحين كل اشي مزبوط بهالبلد بس ناقص يمنعوا الغناني؟؟ مهي كلها خربانة .
المثبط : والله اذا استلموا لنصير زي سوريا،، بس مستغرب انو بلد بدو يؤوينا ، لا ظل سوريا ولا لبنان ولا العراق نروحله !!!
اليائس : يا زلمه انت مصدق كلامهم اصلاح وحكي فاظي ، شو بدو يوخذ لظراط من البلاط ، كلوا حكي فاظي بس بسكرولي هالشوارع وبوقفوا حال الناس !!!
المصلح : ها لعاد كيف بدك توخذ حقوقك ؟؟؟
اليائس : لا بدي حقوق ولا بدي مناصب بعيش زي ما عاش ابو وجدي ، الله ما بيقطع حدا .
المثبط : على اساس لو استلمتو رح تدوروا بصواني الذهب والفضة على الفقراء زي ايام عمر ابن عبد العزيز !!!
اليائس : والله اذا هلحين بتنقط غير تجف على ايامكو، الله يخليلنا الملك والله لولاه كان ذبحنا بعظ .
المثبط : الله اسلم ثمك ، هاظ الحكي ، بعدين المخطط اكبر منا كلنا ، مسمعتوش بالفوضى الخلاقة والوطن البديل ؟؟؟
المصلح : يا زلمة احنا كل ما قلنا عن اصلاح ومحاربة فساد بتقولولي وطن بديل ؟؟؟؟ شو العلاقة بين القضاء على الفساد والوطن البديل ؟؟؟؟
المثبط : يا زلمة انو فساد هو كل ما واحد طلع " عالانترنت " وقال فلان حرامي بدكو تقيموا عليه الحد ؟؟
اليائس: والله هذول سرقوا وشبعوا وانتهينا ، احسن ما ييجينا ناس جعانة زيكوا وبلشوا يصرقوا من اول لبو جديد !!!
المثبط : لا يا زلمة هذول ما بسرقوا - وبشوية مسخرة - هذول بدهم اخلوا الاردن المدينة الفاظلة بدهم اخلوا الاردني والفلسطيني يسرحوا مع بعظ !!!!!
المصلح : ولويش ما يسرحوا مع بعظ ؟؟؟ شو ناقصهم ؟؟
المثبط : يا شيخ اتخيب بلا حكي فاظي
اليائس : شو رايكو تتخيبوا لثنين وتفكونا من هالغنجة ؟؟؟
تلعبوا شدة ؟؟؟؟ يا فلان هات الشدة وتعال العب ناقصنا رابع
وتنساش الورقة والقلم ،،،، بدنا نكسر روسهم الليلة .....
وخذ سخن ابريق هالشاي قبل !
