حكم الشعب!!

بعد ان طالب جلالة الملك في خطاب العرش القواعد الجماهيرية بمحاسبة النواب الذين حظوا بأصواتهم، وطالب النواب ايضا بمحاسبة الحكومة التي اعطيت ثقتهم، طالب الحكومة بنبذ الواسطات والمحسوبيات وخدمة المواطن ، فيما اسماه جلالته بالثورة البيضاء !!

واليكم واقعنا السياسي حسب رؤية الملك  واستشرافه للمستقبل !!

يخرج  الحج ابو زهدي من البيت  مبكرا - مع انو عواطلي - ويجد حفرة في الشارع ،فيستشيط  غضبا ويتوجه الى بيت النائب الذي اعطاه صوته طارقا الباب تارة بكف يده وتارة بقدمه واخرى بعكازه ، حتى كاد يخلعه من مكانه :

النائب من الداخل : يا فتاح يا عليم يا رزاق يا كريم ايوه ايوه مين ؟؟؟ 

الحج : مين ؟؟؟ طبعا ما انت غارق في العسل ونايم للساعة ثمنية ،،،،، انا القاعدة الشعبية الي حطتك تحت القبة ، افتح افتح 

النائب يفتح الباب : خير يا زلمة كسرت الباب مش صابر تنفتح  ؟

الحج : اي بدي اكسر الباب واكسر رقبتك معه لويش نايم لعساع؟طبعا الكرسي وامنتو واحنا الله لا يردنا .

النائب : يا زلمة فوت نتخرف جوة مالك ؟؟ بنفعش عالباب .

الحج : اي دارك محرمة علي زي ما تحرمت على امي ، يا زلمة انت مش شايف الحفرة في الشارع ؟؟؟لويش انتخبناك لعاد ؟؟

النائب مبتسما : هاظ هي لعاد ؟؟؟ خش خش وما بصير الا اللي بدك اياه .

الحج :على الطلاق ان رجعت من القهوة الظهر وما كانت مزفتة لاسحب صوتي انا والقواعد الشعبية ونرميك زي الكلب برا البرلمان !

النائب : هاظ مولعة معك خلص يا زلمة والله ما بصير الا اللي بدك اياه ، 

الحج : يلا سلام يا ،،،،،، نائب 

النائب يزبد ويرعد وقد دخل للبيت : يا مرة هاتي العباية والمشاية بدي اطلع 

المرة : وين يا زلمة من الصبح طب اشرب قهوتك :

النائب : بديش اتبلعس ،،،، هاظ انا منقلع !! 

النائب يتوجه الى مبنى رئاسة الوزراء وينادي من الخارج : وين دولته ؟؟؟؟

الحاجب : والله لسة مجاش 

النائب : طبعا شمسه عالية ما احنا اللي بوجه القواعد الشعبية مش هو 

وفي اثناء زمجرة النائب يدخل دولة رئيس الوزراء : خير خير مال صوتك طالع ؟؟

النائب : اسمع دولتك احنا ما اعطيناك الثقة منشان تداوملي الساعة تسعة واحنا قاعدين تبهدل من ط......ز الصبح  من اللي بسوى واللي بسواش وكل يوم والناس هاتين علي انهم اعطوني اصواتهم .!! اسمع في حفرة بشارع داري انفظحت منشانها ، ولازم تتزفت اليوم قبل الظهر لانو القواعد الشعبية رايحة تبهدلني اذا ما تسوت .

دولته مبتسما : بس هيك ؟ حاظرين 

النائب :  على الطلاق اذا ما تزفتت اليوم لاحجب عنك الثقة من بكرة الصبح ، وهيني بحذرك 

دولته ممتعضا : طيب طيب خلاص اليوم انشالله ، ول شو قلنا ؟؟؟

النائب : قبل الظهر بديش فظايح 

دولته : قلنالك حاضر ،،،،،،،،،،،،،،،،، وانصرف النائب 

دولته لمدير مكتبه : اجمعلي الوزرا كلهم  قبل الساعة عشرة ،،،،،،، وبالفعل حضر جميع الوزراء 

دولته : اسمعوا ترا انا اللي بوجه النواب  وكل يوم بهددوني بسحب الثقة ، اللي مش عاجبه منكم الشغل معنا يحكي ، ترا  في ستميت واحد بستنا اشارة من اصبعي زي  عبدالهادي المجالي والدغمي والسرور ،،، حلوة بالله نطلع من الوزارة منشان حفرة في الشارع ؟؟

اسمعوا الله يرضى عليكو زمان اول حول ، هاذي القعدة وشرب القهوة والشاي بتمشيش معي،  القواعد الشعبية هالكة النواب والنواب بتفششوا في ، الله يخليكو ماسورة المي تبعت مبارح وحفرة اليوم قدام بيت النائب اليوم بدهم يخلصوا ،،، 

على الطلاق اذا ما خلصو اليوم ما بظل واحد فيكي وزير عندي ، ولأفنشه وافنش كل قرايبه !!!

وزير الاشغال حاظر سيدي .

دولته : والحفرة ظروري ظروري قبل الظهر ،،، بعرفش ليش بس هيك القواعد الشعبية بدها .

يخرج وزير الاشغال مسرعا ، طالبا على الهاتف مدير مكتبه ،،،، اسمع كل المدرا بدي اياهم باجتماع قبل الساعة 11 ظروري  

مدير مكتبه : حاظر سيدي 

وعند وصول الوزير :اسمعوا انتو هان متداريين في الوزارة وانا اللي زي ممسحة الزفر قدام دولته كل يوم بنطس ، اللي عاجبه يشتغل اهلا وسهلا اللي مش عاجبه الله معه، ترا بقدر اعين ميت مدير في عشر دقايق !!!!
اسمعو  في حفرة عند دار النائب فلان بدها تزفيت اليوم وقبل الظهر كمان ، اتصلوا بأقرب سيارة زفته خلينا نخلص ،،،،،،
 وعلي الطلاق ان ما خلصنا من هالغنجة اليوم لغيركو كلكو  ،،،،، وينفض الاجتماع .

يعود ابو زهدي  بعد صلاة الظهر يقظا مترقبا ، وتنفرج اساريره عندما يرى الحفرة " زفتت " وبدأ يمشي كالطاووس عندما لمح النائب من بعيد في انتظاره !!

النائب : ها يا حج كيف رظاك علينا ؟؟؟

الحج : تسلم تسلم  معلش عصبت عليك الصبح  ، بس الحق عليك مش مراعي مصالح اللي انتخبوك.

النائب:  له يا زلمة انت زي اخوي لكبير وطلباتك اوامر .

الحج : هاذ مش طلبات والمفروظ انت تراقب الشارع كل يوم مش انا اجي اوريك شغلك صح ؟؟؟؟

النائب : صح يا حج صح ، الله يقدرنا ونخدمكو .

في المساء  رئيس الوزراء يتصل بوزير الاشغال :

دولته : الو شو نايم طبعا ، لا هم دنيا ولا عذاب اخرة ، مرتاح 

الوزير : مسا الخير دولتك خير أأمرني 

دولته :  شو صار بالموضوع اللي حكينا فيه  الصبح ؟؟؟

الوزير : كلو تمام يا سيدي ووديت مدير مكتبي بنفسه تخلصوا التزفيت 

دولته : الله يعطيك العافية ،،،  طيب ومسورة المي ؟؟؟

الوزير : ضاربا كفه بجبينه !!!! يااااااااه والله نسيت يا سيدي هسا هسا 

دولته مقاطعا : وين هسا بنص هالليل ، الله لا يعطيني عافية اللي بعتمد عواحد زيك ، الله يسترنا الصبح من السانات القواعد الشعبية 

اكتبلي استقالتك والصبح بدي اياها عمكتبي ،،،،،، ويغلق السماعة  ...


في الصباح وزير الاشغال يتقدم لدولته بالاستقالة ،
دولته : خلص خلص فش داعي ، طرنا كلنا من تحت راسك ،،،، المجلس حجب الثقة واستقالتي صارت عمكتب سيدنا !!

وبعدها بكم يوم حل جلالته المجلس تحت ضغط  القواعد الشعبية !!

اتاري بدل الحفرة كاين في حفر ، وبدل الماسورة عشرة !!!

فعلا الشعب مصدر السلطات !!!!