بما اني عواطلي ولا شغلة ولا عملة ، صارلي اسبوع قاعد عالانتر نت اتتبع اخبار الوطن، وشفت العجب يا ابو حسبن في "جود نيوز " من وجهة نظر المتسلقين و"باد نيوز "،،،، مع انو الخبرين " يور ماجستي " مش كويسين من وجهة نظري !!!
الخبر لكويس - حسب ما بنقلولك اللي حواليك - انو في عشرات الصفحات على " صباح لكتاب " يعني الفيس بوك بتأيدك والعجيب انو الاعداد بتزيد بشكل مش طبيعي ، يعني خلال ساعات بصيروا الاعضاء بالالاف بتعرفش كيف بفرخوا بهالسرعة ، تقول خلايا سرطانية - الله يجيرنا - !!
طبعا هالخبر ببسطك لانو - حسب اللي حواليك - هذا دليل ولاء وحب الشعب الك، بس اللي بتعرفوش انو جيشك الالكتروني بتكون من " اكمن مقلعط " كل واحد بفتح الف صفحة باليوم وبنضم لهاي المجموعات ، لاني قعدت في وحدة من المجموعات اكثر من ساعة ما شفت تعليق واحد !!
شكلو كان وقت غداهم !!!
بس يا ابو حسين والله وخذ مني انو على راي المصريين اكثير " اوفر " يعني مديح وعبارات بتحطك تحت ربنا بشوي زغيرة ، والشباب - والحق يقال - يبذلون جهودا مضنية لايصالك لمرتبته عز وجل !!! يا رجال تخيل من هالعبارات بدهم يحرقوا العالم مشانك
،،،وواحد بقول : " روحي وقلبي وعمري ودمي وعظمي ولحمي وترابي لما اموت فداك يا ابو حسن "
يا رجال مبسود من هالعرط ؟؟؟؟ اي والله لو اصيرلك اشي ما بتبرعولك بوحدة دم !!!!!،
بدي اقترح عليك اقتراح ، قررت اصير مخابرات الك شو رأيك؟؟؟ بس انا عندي شروط !!! انا بقبل اصير مخابرات وبدون راتب كمان ، بشرط اني لا اطبل ولا ازمر ولا افديك لا بالروح ولا بالدم - وتزعلش مني - لاني لو بدي افدي حد كان فديت ابوي اللي مات وانا واخوتي لساتنا على رأي امي " كوم لحم " !!!
انا مستعد اجيبلك الاخبار الصحيحة من الشارع ، لاني حاسس انها ما بتوصلك ، لكان معقول عارف شو بصير بالشارع وحاط اديك ورجليك بمي باردة !!!!
انا يا ابو حسين صرت اسمع وبأكثر من مكان " انو الشعب يريد اسقاط النظام " اي نعم على استحياء ومن قلة من الناس لكن على راي الشاعر "معظم النار من مستصغر الشرر "
.
وبصراحة انت الغلطان ، شارعك تحرك من شهر 12 السنة الماضية ، يعني قبل كل هالانظمة الي طاحت ، وانت ما في الا "عينو خير" و"بصير خير" " وتوكلوا على الله " ،،، والوضع من سيء لاسوأ وما في شي بتغير ، الناس حاولت تبعد عن جلالتك قدر الامكان ، وتفششوا بالوزراء والنواب وشاهين والكازينو والفساد ولا حياة لمن تنادي ، وقطب يا ابو حسين اذا بتعرف تقطب !!!
اي بشار اللي مكانش الواحد يجيب سيرته حتى بالخير من الخوف ، صارت سيرتو على كل لسان والفولو اغاني وهتافات ضده ، انت شو بدو يصير فيك !!!
الحقيقة بتزعل بس عن جد الوقت ضيق يا بتلحق يا ما بتلحق ،،،، ويمكن اصير شي قبل ما يوصلك تقريري المخابراتي الثاني ،،،
سلام يور ماجستي ، تاك كير!!
